Biz imzaları yox, əsərləri dərc edirik...

Xivədə Türk dünyası ölkələri poeziya günləri
460
13 Yanvar 2020, 15:02
 2020-ci ildə "Özbəkistanın Xivə şəhərinin Türk dünyasının mədəniyyət paytaxtı” elan edilməsi ilə əlaqədar Özbəkistan, Azərbaycan və digər Türk dünyası ölkələrinin şairlərinin bu şəhərdə təntənəli poeziya gününün keçirilməsi nəzərdə tutulub. 
 Özbəkistandakı Heydər Əliyev adına Azərbaycan Mədəniyyət Mərkəzindən verilən məlumata görə, Özbəkistan Yazıçılar Birliyi ilə birgə reallaşdırılacaq təntənəli şeir gecəsi 2020-ci ilin mart ayında Özbəkistanın Xivə şəhərinin Türk dünyasının mədəniyyətinin paytaxtı” elan edilməsi ilə əlaqədar keçiriləcək və tədbirdə Özbəkistan və Azərbaycan ədəbiyyatının tanınmış simaları, Xalq şairləri, gənc şairləri iştirak edəcəklər. Tədbirə türk dünyasının digər ölkələrindən də şairlər dəvət olunacaqlar. 
 
 

 Tədbir çərçivəsində iştirakçılar türk dünyası ölkələri şairlərinin şeirlərini dinləyəcək, şairlərimiz qardaş ölkələrin ədəbiyyatları, sənətləri haqqında düşüncələrini bölüşəcək və onlar arasında fikir və sənət mübadiləsi həyata keçiriləcəkdir. Poeziya günlərinin iştirakçısı olan şairlərin Xarəzm vilayətindəki Urgənc Dövlət Universitetinin tələbələri ilə görüşləri, Dövlət Televiziyasında təşkil olunan verilişdə iştirakları nəzərdə tutulub. 
 Tədbir çərçivəsində Azərbaycan və Özbəkistanın şairlərinin şeirlərinə bəstələnən Qala-konsert keçiriləcəkdir. Konsertdə hər iki ölkənin tanınmış muğam ustaları çıxış edəcəklər. 
 Qeyd edək ki, iştirakçı şairlər Özbəkistanın ali məktəblərində yaradılmış Azərbaycan Mərkəzləri, ocaqları ilə tanış olacaq, Özbəkistan Milli Elmlər Akademiyasının Nəvai adına dil, ədəbiyyat, folklor İnstitutunda təşkil edilən Nəsimi adına Azərbaycan ədəbiyyatı Mərkəzinin açılışına da qatılacaqlar.